विशेष शिबिरात 101 पत्रकारांची कोव्हीड 19 आर.टी.-पी.सी.आर.चाचणी
कोरोनाचा वाढता प्रादुर्भाव रोखण्यासाठी नवी मुंबई महानगरपालिकेच्या वतीने 'मिशन ब्रेक द चेन' हाती घेऊन विविध उपाययोजना राबविल्या जात असताना नवी मुंबई शहरात पत्रकारिता करणा-या विविध वृत्तपत्र व वृत्तचित्रवाहिनी प्रतिनिधी आणि कॅमेरामन यांच्या वतीने महापालिका आयुक्त श्री. अभिजीत बांगर यांचेकडे सर्व पत्रकारांची कोव्हीड 19 तपासणी करण्यात यावी अशी मागणी करण्यात आली होती. इतर अनेक अत्यावश्यक सेवेतील घटकांप्रमाणेच पत्रकारही सामाजिक भावनेतून समाजात मिसळून आपले काम करीत असतात हे अधोरेखीत करीत महापालिका आयुक्तांनी या मागणीला त्वरीत मान्यता दिली होती.
त्यास अनुसरून आज वाशी येथील विष्णुदास भावे नाट्यगृह येथे नवी मुंबई महानगरपालिका आरोग्य विभागाच्या माध्यमातून पत्रकारांकरिता कोव्हीड 19 आर.टी.-पी.सी.आर. चाचणी शिबिराचे आयोजन करण्यात आले होते. या शिबिरास चांगला प्रतिसाद देत विविध वृत्तपत्रे व वृत्तचित्रवाहिन्यांमध्ये कार्यरत 101 प्रतिनिधी, कॅमेरामन यांनी आपली चाचणी करून घेतली.
नवी मुंबई महानगरपालिकेची नेरूळ येथे अत्यंत अद्ययावत अशी 1000 चाचण्या प्रतिदिन क्षमतेची अत्याधुनिक आर.टी.-पी.सी.आर. प्रयोगशाळा कार्यान्वित असून 24 तासांच्या आत या चाचण्यांचे अहवाल प्राप्त होणार आहेत. यामध्ये पॉझिटिव्ह अहवाल प्राप्त होणा-या पत्रकारांना नवी मुंबई महानगरपालिकेच्या वतीने त्यांच्या लक्षणांनुसार योग्य आरोग्य सुविधेमध्ये उपचारासाठी दाखल करण्यात येणार आहे.
Published on : 11-09-2020 16:47:31,Posted by : Navi Mumbai ,Category : News and update