दिवाळीनंतरच्या काळात कोव्हीड 19 ची दुसरी लाट येण्याचा संभाव्य धोका लक्षात घेऊन नवी मुंबई महानगरपालिकेच्या वतीने 'मिशन ब्रेक द चेन - 2' मोहीम हाती घेण्यात आली असून यामध्ये रूग्णशोधावर भर देत ट्रेस, ट्रिट आणि ट्रिटमेंट ही त्रिसूत्री राबविण्यात येत आहे.

      या उपाययोजनांमध्ये अधिक भर घालत आ.श्री.गणेश नाईक यांच्या माध्यमातून एच.डी.एफ.सी. बँकेच्या सी.एस.आर. निधीतून उपलब्ध झालेली आरोग्य तपासणी रूग्णवाहिका नवी मुंबईकरांचे आरोग्य जपणुकीसाठी आजपासून सज्ज झालेली आहे. महापालिका मुख्यालयासमोर या आरोग्य तपासणी रूग्णवाहिकेचे लोकार्पण ऐरोली विधानसभा सदस्य आ.श्री.गणेश नाईक यांच्या हस्ते संपन्न झाले. याप्रसंगी महापालिका आयुक्त श्री. अभिजीत बांगर, माजी खासदार श्री. संजीव नाईक, माजी आमदार श्री. संदीप नाईक. माजी महापौर श्री. सागर नाईक, श्री. सुधाकर सोनवणे, श्री. जयवंत सुतार, अतिरिक्त आयुक्त श्रीम. सुजाता ढोले व श्री. संजय काकडे आणि इतर मान्यवर उपस्थित होते.

      कोव्हीडच्या काळात नवी मुंबईकर नागरिकांच्या आरोग्य तपासणीसाठी हे वाहन अत्यंत उपयोगी ठरेल व यामुळे विशेषत्वाने सर्वसामान्य नागरिकाला मोफत आरोग्य सुविधा उपलब्ध होत असल्याबद्ल आमदार श्री. गणेश नाईक यांनी समाधान व्यक्त केले.

      डॉक्टरांसह सुसज्ज असलेला सदर फिरता दवाखाना महापालिका क्षेत्रात ठिकठिकाणी जाणार असून नागरिकांचे मोफत वैद्यकीय तपासणी करणार आहे. त्याचप्रमाणे कोव्हीड 19 मध्ये सहव्याधी (COMORBID) असणा-या व्यक्ती जोखमीच्या असल्याने या फिरत्या दवाखान्यामध्ये ब्लड प्रेशर आणि डायबेटीस तपासणी विनामुल्य केली जाणार आहे. त्याचप्रमाणे नागरिकांना मोफत औषधोपचारही दिला जाणार आहे. नवी मुंबईच्या आरोग्य रक्षणासाठी महानगरपालिका करीत असलेल्या उपाययोजनांमध्ये या फिरत्या दवाखान्यामुळे लक्षणीय भर पडलेली आहे.