कोणतीही कला माणसाच्या सर्वांगीण विकासासाठी अत्यंत पोषक असून नवी मुंबई महानगरपालिका अशा स्पर्धा व उपक्रमांतून नागरिकांच्या कलागुणांना वाव देण्याचे चांगले काम करीत असल्याचे मत व्यक्त करीत आमदार श्री. गणेश नाईक यांनी नवी मुंबई हे देशाच्या विविध प्रांतातील लोकांना आपुलकीने सामावून घेणारे मनाने श्रीमंत माणसांचे सांस्कृतिक शहर असल्याचे मत व्यक्त केले.

      नवी मुंबई महानगरपालिकेच्या वतीने ‘नमुंमपा करंडक राज्यस्तरीय एकांकिका स्पर्धे’च्या महाअंतिम फेरीनंतर झालेल्या पारितोषिक वितरण समारंभप्रसंगी वाशीतील विष्णुदास भावे नाट्यगृहात ते आपले मनोगत व्यक्त करीत होते.

      प्राथमिक फेरीत सहभागी 40 एकांकिकांतून महाअंतिम फेरीसाठी निवडलेल्या 15 एकांकिकांमधून कलामंथन, ठाणे यांच्या ‘फ्लाईंग राणी’ या एकांकिकेने सर्वोत्तम सादरीकरण करीत नवी मुंबई महानगरपालिका राज्यस्तरीय करंडक 50 हजार रक्कमेचे पारितोषिक तसेच प्रशस्तिपत्रासह पटकाविला.

     नवी मुंबई महानगरपालिका क्षेत्रातून सादर झालेल्या एकांकिकांमधून सर्वोत्कृष्ट एकांकिकेचा 11 हजार रक्कमेसह प्रशस्तिपत्र व सन्मानचिन्हासह विशेष पुरस्कार शिवरणभूमी प्रशांत प्रतिष्ठान, ऐरोली यांच्या ‘आय एम पुंगळ्या शारूक्या आगीमहूळ’ या एकांकिकेस प्राप्त झाला. 

      या विजेत्यांना ऐरोली विधानसभा सदस्य आमदार श्री. गणेश नाईक यांच्या शुभहस्ते सन्मानीत करण्यात आले. याप्रसंगी अतिरिक्त आयुक्त श्री. संजय काक़डे, क्रीडा व सांस्कृतिक कार्य विभागाचे उपआयुक्त श्री. सोमनाथ पोटरे, महापालिका सचिव श्रीम. चित्रा बाविस्कर, शिक्षणाधिकारी श्रीम. अरूणा यादव, वाशीचे सहा. आयुक्त श्री. दत्तात्रय घनवट, क्रीडा अधिकारी श्री. रेवप्पा गुरव तसेच महाअंतिम फेरीचे परीक्षक ज्येष्ठ नाट्य दिग्दर्शक श्री. कुमार सोहोनी आणि श्री. विजय केंकरे, अभिनेत्री श्रीम. ईला भाटे त्याचप्रमाणे प्राथमिक फेरीचे परीक्षक सुप्रसिध्द अभिनेते श्री. शेखर फडके, श्री. रवी वाडकर, श्री. वैभव सातपुते आदी मान्यवर उपस्थित होते.

ज्येष्ठ नाट्यदिग्दर्शक श्री. कुमार सोहोनी आणि श्री. विजय केंकरे यांना मानपत्र प्रदान करून विशेष सन्मान

      नमुंमपा करंडक राज्यस्तरीय एकांकिका स्पर्धेचे परीक्षण करणारे ज्येष्ठ नाट्यदिग्दर्शक श्री. कुमार सोहोनी यांना नुकताच कलाक्षेत्रातील सर्वोच्च मानाचा संगीत नाटक अकादमी राष्ट्रीय कलापुरस्कार महामहीम राष्ट्रपती महोदयांच्या शुभहस्ते प्राप्त झाला असल्याने त्यांचा आमदार श्री. गणेश नाईक यांच्या हस्ते नाट्य, चित्रपट क्षेत्रातील सुवर्णमहोत्सवी कारकिर्दीचा गौरव करणारे मानपत्र प्रदान करून विशेष सन्मान करण्यात आला.

     त्याचप्रमाणे प्रयोगशील नाट्यदिग्दर्शक म्हणून ख्याती असणारे व नाटक एके नाटक हा ध्यास घेऊन नाट्यक्षेत्रामध्ये 40 हून अधिक वर्षे अथक कार्यरत असणारे ज्येष्ठ नाट्यदिग्दर्शक श्री. विजय केंकरे यांची शंभरावी नाट्य दिग्दर्शकीय कलाकृती काळी राणी रंगमचावर अविष्कृत झाली आहे. या नाट्यसेंच्युरीच्या आगळ्यावेगळ्या विक्रमाबद्दल त्यांनाही मानपत्र प्रदान करून समस्त नवी मुंबईकर रसिकांच्या वतीने सन्मानीत करण्यात आले.  

      याप्रसंगी बोलताना नाट्यदिग्दर्शक श्री. कुमार सोहोनी यांनी महानगरपालिकेने मानपत्र देऊन अनपेक्षितपणे केलेल्या सन्मानामुळे भारावून गेलो असल्याचे मत व्यक्त करीत या राज्यस्तरीय एकांकिका स्पर्धेमुळे राज्याच्या विविध भागातील एकांकिका बघायला मिळाल्या व वैविध्य अनुभवता आले याचा आनंद व्यक्त केला. अशा एकांकिका स्पर्धांतून आपल्याला खूप काही शिकायला मिळते, फक्त डोळे उघडे ठेवून शिकण्याची वृत्ती हवी असाही संदेश त्यांनी सहभागी रंगकर्मींना दिला.

      नाट्यदिग्दर्शक श्री. विजय केंकरे यांनी आम्ही तिघांनी लावलेला स्पर्धेचा निकाल बहुमताने नाही तर एकमताने लावलाय असे जाहीर करीत स्पर्धकांनी आपले नाटक उत्तम सादर केले की झाले असा दृष्टिकोन न बाळगता इतरांचीही नाटके बघून स्वत;च्या जाणीवांचा परीघ वाढवावा असे सांगितले. नाटकाच्या दृश्यामध्ये चित्रापेक्षा चौकट मोठी होता कामा नये असे मार्मिक भाष्य करीत त्यांनी मातीशी इमान राखणारी नाटके करणा-या रंगकर्मींचे कौतुक केले.      यावेळी 30 हून अधिक वर्षे आपल्या सालस व संस्कारित अभिनयाने नाट्य, चित्रपट व मालिकांमध्ये लिलया संचार करणा-या अभिनेत्री परीक्षक श्रीम. इला भाटे यांचाही सन्मानचिन्ह प्रदान करून विशेष सन्मान करण्यात आला.

      नवी मुंबई महानगरपालिकेने केलेल्या सुयोग्य आयोजनाची तिन्ही मान्यवर परीक्षकांनी प्रशंसा केली.  

      दोन दिवस चाललेल्या महाअंतिम फेरीतील 15 एकांकिकांमधून कलामंथन, ठाणे यांच्या ‘फ्लाईंग राणी’ यांनी बाजी मारत नमुंमपा राज्यस्तरीय करंडक पटकाविला. माय नाटक कंपनीची ‘गोदा’ ही एकांकिका व्दितीय तसेच सिध्दरूढ, ठाणे यांची ‘डिट्टो रखुमाई’ ही एकांकिका तृतीय क्रमांकाची मानकरी ठरली. डिपार्टमेंट ऑफ टेक्नॉलॉजी शिवाजी विद्यापीठ यांची ‘विषाद’ तसेच स्वभाव कल्याण यांची ‘#फॅमजॅम’ या एकांकिका उत्तेजनार्थ पारितोषिकाने सन्मानीत झाल्या.

      नवी मुंबई महानगरपालिका क्षेत्रातील सर्वोत्तम एकांकिकेचे विशेष पारितोषिक शिवरणभूमी प्रशांत प्रतिष्ठान, ऐरोली यांच्या ‘आय एम पुंगळ्या शारूक्या आगीमहुळ' या एकांकिकेने पटकाविले. या एकांकिकेचे दिग्दर्शक श्री. प्रशांत निगडे यांची एकांकिका यावर्षीच्या महाराष्ट्र राज्य नाट्य स्पर्धेत व्दितीय क्रमांकाची मानकरी ठरलेली असून नवी मुंबईचा नावलौकिक राज्यभरात कलाप्रांतात वाढविणा-या या रंगकर्मीचा विशेष सन्मान याप्रसंगी करण्यात आला.  

      याशिवाय सर्वोत्कृष्ट दिग्दर्शक, सर्वोत्कृष्ट लेखक, सर्वोत्कृष्ट अभिनेता, सर्वोत्कृष्ट अभिनेत्री, सर्वोत्कृष्ट संगीत, सर्वोत्कृष्ट प्रकाशयोजना, सर्वोत्कृष्ट नेपथ्य, सर्वोत्कृष्ट रंगभूषा व वेशभूषा अशी वैयक्तिक पारितोषिकेही रोख रक्कम, सन्मानचिन्ह, प्रशस्तिपत्रे स्वरूपात प्रदान करण्यात आली. प्राथमिक फेरीतील उत्तम अभिनयाची प्रशस्तिपत्रेही यावेळी वितरित करण्यात आली. त्याचप्रमाणे स्पर्धेत सहभागी सर्व 40 एकांकिका समुहांना प्रशस्तिपत्रांसह सन्मानचिन्ह प्रदान करण्यात आले.

      पारितोषिक वितरण सोहळ्याप्रसंगी तनुश्री पोटरे, त्विशा  तेली, प्रिया समर्थ, यशश्री देसाई, तन्वी घनवटकर तसेच नमुंमपा शाळा क्र. 18, वाशी च्या विद्यार्थी समुहाने नृत्य सादरीकरण करून कार्यक्रमात नृत्यरंग भरले. त्यांचाही यावेळी विशेष सन्मान करण्यात आला.

      नवी मुंबईसह ठाणे जिल्हा, रायगड, पालघर, रत्नागिरी, नाशिक, पुणे, कोल्हापूर, जळगाव, अमरावती अशा महाराष्ट्र राज्यातील विविध भागांतून या एकांकिका स्पर्धेस उत्साही सहभाग लाभल्याने कलावंतांनी एकच जल्लोष केला होता. नवी मुंबई महानगरपालिकेच्या सांस्कृतिक कार्य व क्रीडा विभागाने केलेल्या नेटक्या आयोजनाचे मान्यवर परीक्षकांसह राज्यभरातून आलेल्या एकांकिका समुहांनी कौतुक केले.