जागतिक क्षयरोग दिनानिमित्त नवी मुंबई महानगरपालिकेमार्फत विविध कार्यक्रमांचे आयोजन
24 मार्च हा दिवस जागतिक क्षयरोग दिवस म्हणून विश्वभरात साजरा करण्यात येतो. या दिनाचे औचित्य साधून जागतिक आरोग्य संघटनेच्या वतीने क्षयरोग संदर्भात लक्ष वेधून घेण्यासाठी क्षयरोग निर्मुलन संदर्भातील महत्वाच्या बाबींवर प्रकाश टाकण्याकरिता दरवर्षी 24 मार्च रोजी जागतिक स्तरावर घोषवाक्य प्रसारित करते.
यावर्षीचे घोषवाक्य - “होय, आपण क्षयरोग संपवू शकतो (Yes!, We Can End TB)” हे आहे. या घोषवाक्यास अनुसरून नवी मुंबई महानगरपालिका आयुक्त श्री. राजेश नार्वेकर यांच्या मार्गदर्शनाखाली शोध आणि उपचारांची कार्यप्रणाली योग्य रितीने राबविणार असून आपण क्षयरोग संपवू शकतो असा विश्वास क्षयरोग झालेले रूग्ण आणि प्रत्येक माणसामध्ये रूजविण्यासाठी प्रयत्न करणार आहे.
भारताचे पंतप्रधान ना.श्री. नरेंद्र मोदी यांनी सन 2025 पर्यंत देशातून क्षयरोगाचे दूरीकरण करण्याचे ध्येय निश्चित केले आहे. हे ध्येय साध्य करणेकरिता सन 2015 च्या तुलनेत क्षयरोगाच्या प्रमाणात 80% घट, सन 2015 च्या तुलनेत क्षयरोगामुळे होणाऱ्या मृत्यूच्या प्रमाणात 90% घट आणि क्षयरोगाचे नि:शुल्क उपचार अशी 3 उद्दिष्टे पूर्ण करणे अत्यंत आवश्यक आहे.
त्या अनुषंगाने नवी मुंबई महानगरपालिकेच्या वतीने विविध उपक्रम राबविण्यात येत आहेत. महानगरपालिका कार्यक्षेत्रात केंद्र सरकार व राज्य शासनाच्या मागदर्शक सूचनांनुसार 23 नागरी प्राथमिक आरोग्य केंद्रे, 3 सार्वजनिक रुग्णालये व 2 माता बाल रुग्णालयांमार्फत राष्ट्रीय क्षयरोग दूरीकरण कार्यक्रम राबविण्यात येत असून त्यामध्ये रुग्णास मोफत तपासणी व औषधोपचार देण्यात येतो.
दरवर्षी 24 मार्च हा दिवस ‘जागतिक क्षयरोग दिन’ म्हणून साजरा करण्यात येतो. या दिनानिमित्त नवी मुंबई महानगरपालिकेच्या वतीने क्षयरोग विषयक विविध उपक्रमांचे आयोजन करण्यात येत आहेयामध्ये प्रत्यक्ष क्षयरुग्ण शोध मोहीम, शालेय स्तरावर चित्रकला व निबंध स्पर्धा आयोजन तसेच महिलांकरिता रांगोळी स्पर्धा आयोजन, त्यासोबतच रॅली, पथनाटय, जनसमुदाय सभा याव्दारे जनजागृती, या व्यतिरिक्त कर्मचारी प्रशिक्षण, शालेय विदयार्थी प्रशिक्षण असे विविध उपक्रम, कार्यक्रम राबविण्यात येत आहेत.
जागतिक क्षयरोग दिनाच्या अनुषंगाने तेरणा वैदयकिय महाविदयालय व डॉ.डि.वाय.पाटील वैदयकिय महाविदयालय अंतर्गत पोस्टर्स स्पर्धा, कॉन्फरन्स, पथनाटय, रुग्णांचे आरोग्य शिक्षण अशाही उपक्रमांचे आयोजन करण्यात येत आहे.
राष्ट्रीय क्षयरोग दूरीकरण कार्यक्रमांतर्गत ‘निक्षय पोषण योजना’ अंतर्गत क्षयरुग्णांना उपचार पूर्ण होईपर्यंत दरमहा रु. 500/- इतकी रक्कम त्यांच्या बँक खात्यात थेट जमा करण्यात येते. नागरिकांनी शासकीय रुग्णालयास संशयित क्षयरुग्ण संदर्भित केल्यानंतर रुग्णाचे क्षयरोगाचे निदान झाल्यास माहिती देणाऱ्या नागरिकांस रु. 500/- चा लाभ देण्यात येतो. जे नागरिक क्षयरुग्णांचा यशस्वी उपचार पूर्ण करण्यास मदत करतात त्यांना रु.1000/- रक्कमेचा लाभ देण्यात येतो.
क्षयरोगाचे निर्मूलन करण्याकरिता शासकीय व खाजगी आरोग्य सेवा यांनी एकत्रित काम करणे महत्वाचे आहे. खाजगी क्षेत्रातील सर्व रुग्णालये, क्लिनिक, लॅब्स यांनी त्यांच्याकडे उपचार घेत असलेल्या क्षयरुग्णांची माहिती नवी मुंबई महानगरपालिका आरोग्य विभागास कळविणे आवश्यक आहे.
नवी मुंबई महानगरपालिका, खाजगी संस्था व नागरिक एकत्रित आल्यास नवी मुंबईतून क्षयरोगाचे समूळ उच्चाटन करणे शक्य आहे हा विश्वास व्यक्त करीत महापालिका आयुक्त श्री. राजेश नार्वेकर यांनी आपले नवी मुंबई शहर क्षयरोगमुक्त करण्याकरिता खाजगी संस्था व नागरिकांनी सर्वोतपरी सहकार्य करण्याचे आवाहन केले आहे.
Published on : 23-03-2023 10:43:13,Posted by : Navi Mumbai ,Category : News and update