महाराष्ट्र शासनाच्या क्रीडा धोरणानुसार राज्यातील सर्व महानगरपालिकांना आपापल्या क्षेत्रातील शालेय क्रीडा स्पर्धांकरिता स्वतंत्र जिल्हयाचा दर्जा प्राप्त झालेला आहे. त्यामुळे नवी मुंबईतील गुणवंत खेळाडूंना थेट विभागीय स्तरावर आपल्या गुणवत्तापूर्ण खेळाचे प्रदर्शन घडविणे शक्य होत आहे.

           या अनुषंगाने नवी मुंबई महानगरपालिका क्रीडा व सांस्कृतिक कार्य विभागाच्या वतीनेही जिल्हास्तरीय शालेय क्रीडा स्पर्धांचे आयोजन करण्यात येत असून त्यांना विद्यार्थ्यांचा उत्तम प्रतिसाद लाभताना दिसत आहे. संपूर्ण नवी मुंबई महानगरपालिका क्षेत्रातील 249 शाळांतून 35 हजाराहून अधिक विद्यार्थ्यांच्या या विविध खेळांच्या स्पर्धांमध्ये उत्साही सहभाग लाभला असून प्रत्येक स्पर्धा अत्यंत जल्लोषात पार पडलेली आहे.

           सन 2023-2024 या शैक्षणिक वर्षातील नवी मुंबई जिल्हास्तरीय शालेय क्रीडा स्पर्धांना महापालिका आयुक्त श्री. राजेश नार्वेकर यांच्या शुभहस्ते नेरूळ सेक्टर 19 येथील यशवंतराव चव्हाण क्रीडांगणातील आंतरराष्ट्रीय दर्जाच्या फुटबॉल मैदानात दिमाखदार प्रारंभ झाल्यानंतर ऐरोली स्पोर्ट्स असोसिएशन येथे संपन्न झालेल्या बुध्दीबळ व बॅडमिंटन स्पर्धा नेटक्या आयोजनात नियोजनबध्द रितीने संपन्न झाल्या.

           त्याचप्रमाणे नॉर्थ पॉईंट स्कुल, कोपरखैरणे येथे व्हॉलीबॉल स्पर्धा, फादर ॲग्नेल स्कुल, वाशी येथे जलतरण, रायफल शुटिंग, हॉकी, टेबल टेनिस स्पर्धा, विद्याभवन शिक्षण संकुल नेरुळ येथे योग व नेटबॉल स्पर्धा, नेरुळ जिमखाना येथे लॉन टेनिस स्पर्धा, क्राईस्ट अकॅडमी कोपरखैरणे येथे बास्केटबॉल व सेपक टकरा, एपीजे स्कुल नेरुळ येथे थ्रो बॉल, विब्गोयोर स्कुल ऐरोली येथे ज्युडो स्पर्धा, वारकरी भवन सी.बी.डी. बेलापूर येथे कुस्ती तसेच राजीव गांधी स्टेडियम, सी.बी.डी. बेलापूर येथे सॉफ्टबॉल व आट्यापाट्या स्पर्धा संपन्न झाल्या. या सर्व स्पर्धांना भरघोस प्रतिसाद लाभलेला आहे.

            याशिवाय उर्वरित खेळांच्या शालेय जिल्हास्तरीय क्रीडा स्पर्धा आयोजनाविषयी क्रीडा व सांस्कृतिक कार्य विभागाच्या वतीने आगामी काळात सुयोग्य नियोजन करण्यात आले आहे. या स्पर्धांमध्ये 14, 17 व 19 वर्षाआतील विविध वयोगटामध्ये 249 शाळांमधून 35 हजारहून अधिक मुले व मुलींनी सहभाग घेतलेला होता. या सर्व स्पर्धांच्या आयोजनामध्ये बारकाईने लक्ष देत प्रत्येक ठिकाणी भेटी देऊन क्रीडा व सांस्कृतिक विभागाच्या उपआयुक्त श्रीम. ललिता बाबर खेळाडूंना प्रोत्साहन देत आहेत.

            जिल्हास्तरीय शालेय क्रीडा स्पर्धांचे आयोजन बेलापूर ते दिघा अशा महानगरपालिका क्षेत्रातच होत असून मुले व पालकांसाठी हे सुविधाजनक असल्याने स्पर्धेतील सहभाग संख्येत मोठया प्रमाणात वाढ होत असल्याचे दिसून येत आहे. त्याचप्रमाणे या स्पर्धांचे आयोजन करण्यासाठी ऐरोली स्पोर्टस असोसिएशन, नेरुळ जिमखाना, फादर ॲग्नल स्कुल, क्राइस्ट अकॅडमी, विद्याभवन स्कुल, एपीजे स्कुल, विग्बियोर स्कुल अशा संस्था, शाळा यांच्याकडून सुविधायुक्त सभागृहे व क्रीडांगणे उपलब्ध करुन दिली जात असल्याने खेळाडूंना उत्तम वातावरणात खेळण्याचा आनंद मिळत आहे.

           याचा परिपाक म्हणजे मागील 10 वर्षाच्या तुलनेने स्पर्धेमध्ये सर्वाधिक खेळाडूंचा संघांचा सहभाग दिसून येत आहे. विशेषत: महानगरपालिका शाळांमधूनही विविध खेळांच्या स्पर्धांमध्ये मोठया प्रमाणात खेळाडू सहभागी होऊन प्राविण्य प्राप्त करीत आहेत तसेच पुढील मुंबई विभागीय, राज्यस्तरीय स्पर्धेसाठी पात्र होताना दिसत आहेत. अशाप्रकारे उत्तम स्पर्धा आयोजनाबद्दल क्रीडा शिक्षक, मार्गदर्शक व पालकांकडून समाधान व्यक्त केले जात आहे. या स्पर्धेतून विजयी झालेल्या तसेच विभागीय स्तरावर खेळण्यासाठी पात्र झालेल्या खेळाडूंना महापालिका आयुक्त श्री. राजेश नार्वेकर यांनी अभिनंदन  करीत पुढील स्पर्धेकरिता शुभेच्छा प्रदान केलेल्या आहेत.