नवी मुंबई महानगरपालिका आरोग्य विभागाच्या वतीने महापालिका आयुक्त श्री. राजेश नार्वेकर यांच्या मार्गदर्शनाखाली उपराष्ट्रीय पल्स पोलिओ लसीकरण मोहीम महानगरपालिका क्षेत्रात प्रभावी रितीने राबविण्यात आली. नवी मुंबई महानगरपालिकेच्या 23 नागरी आरोग्य केंद्रांच्या माध्यमातून खाजगी वैद्यकीय व्यावसायिकांचे दवाखाने, सोसायटी कार्यालये, रूग्णालये, रेल्वे स्टेशन, बस डेपो, महत्वाचे नाके अशा विविध ठिकाणी 604 स्थायी, 94 ट्रांझिट व 28 फिरते मोबाईल असे एकूण 726 पोलिओ लसीकरण बूथ स्थापन करण्यात आले होते. यामध्ये 58434 बालकांना पोलिओ लसीकरण करण्यात आले. म्हणजेच 64% अपेक्षित लाभार्थी मुलांचे लसीकरण झालेले आहे.

     'दोन थेंब प्रत्येक वेळी, पोलिओवर विजय दरवेळी' - या घोषवाक्यास अनुसरून 5,59,945 घरांपर्यंत नागरी आरोग्य केंद्रांच्या माध्यमातून पोलिओ लसीकरण मोहीमेची माहिती पोहचविण्यात आली. तसेच आशा व एएनएम मार्फत  कार्यक्षेत्रात जनजागृती करण्यात आली. या शिवाय महानगरपालिका क्षेत्रात 730 बॅनर्स आणि 2936 पोस्टर्समधून व्यापक प्रमाणात माहिती प्रसारित करण्यात आली. साधारणत: 90897 इतके 5 वर्षाखालील लाभार्थी नजरेसमोर ठेवून या मोहिमेचे नियोजन करण्यात आले होते.

      लसीकरण बूथवरील २ हजारहून अधिक कर्मचारी, स्वयंसेवक यांना लसीकरणाचे प्रशिक्षण देण्यात आले होते. बाळाला स्पर्श न करता तसेच ड्रॉपरचा स्पर्श बाळाच्या तोंडाला होणार नाही याची दक्षता घेऊन पोलिओ लस पाजण्यात आली.

      तथापि काही कारणांमुळे ज्या अपेक्षित  लाभार्थी बालकांचे लसीकरण होऊ शकले नाही त्यांना दि. 29 मे ते 02 जून 2023 या कालावधीत घरोघरी जाऊन पल्स पोलिओ डोस देण्याचे नियोजन करण्यात आले आहे.

      आपला भारत देश कायमस्वरूपी पोलिओमुक्त रहावा यादृष्टीने उपराष्ट्रीय पल्स पोलिओ लसीकरण मोहीमेस नवी मुंबईकर नागरिकांनी उत्तम प्रतिसाद दिला. मात्र ज्या बालकांना बूथवर जाऊन डोस घेता आलेला नाही, अशा बालकांसाठी विशेष मोहीम राबविली जात असून घरांना भेट देणा-या स्वयंसेवकांना आपल्या बालकांबाबत योग्य माहिती देऊन पोलिओ डोस पाजून घेण्याबाबत संपूर्ण सहकार्य करण्याचे आवाहन महापालिका आयुक्त श्री. राजेश नार्वेकर  यांच्या वतीने करण्यात येत आहे.