*पामबीच मार्गावरील अपघात रोखण्यासाठी महापालिका आयुक्तांची वाहतुक पोलीस विभागासमवेत विशेष बैठक*
*नवी मुंबईतील पामबीच मार्ग हा वाहन चालकांचा पसंतीचा रस्ता म्हणून सुपरिचित आहे. तथापि या रस्त्यावर होणारे अपघात हा चिंतेचा विषय असून या अपघातांचे प्रमाण कमी करण्यासाठी नवी मुंबई महानगरपालिका वाहतुक पोलीसांच्या सहयोगाने प्रयत्नशील आहे. याकरिता आवश्यक उपाययोजना करण्याच्या दृ्ष्टीने महापालिका आयुक्त श्री. अभिजीत बांगर यांनी वाहतुक पोलीस विभागासमवेत तातडीने बैठक घेत सखोल चर्चा केली.*
वाहतुक पोलीस उपआयुक्त श्री. पुरुषोत्तम कराड आणि नमुंमपा शहर अभियंता श्री. संजय देसाई यांचे समवेत सविस्तर चर्चेमध्ये मोराज सर्कल सानपाडा, अक्षर सिग्नल, टीएस चाणक्य व सारसोळे सिग्नल ही पामबीच मार्गावरील चार ठिकाणे सर्वाधिक अपघातप्रवण अर्थात ब्लॅकस्पॉट असल्याचे निदर्शनास येत असल्याने त्या ठिकाणी प्राधान्याने उपाययोजना करण्याबाबत विचारविनीमय करण्यात आला.
नवी मुंबई महानगरपालिकेच्या वतीने यापूर्वी पाम बीच मार्गावरील सुरक्षित वाहतुकीच्या दृष्टीने आय.आय.टी.मार्फत पाहणी करण्यात येऊन सूचविण्यात आलेल्या उपाययोजना करण्यात आलेल्या आहेत. पाम बीचवर झालेल्या अपघाताच्या विविध कारणांचा विचार करताना चालकाचे वेगावर नियंत्रण सुटणे ही बाब प्रामुख्याने दिसून येत आहे.
वाहतुक पोलीस विभागामार्फत स्पीड गनव्दारे वेग मर्यादा ओलांडणा-या बेजबाबदार वाहन चालकांवर दंडात्मक कारवाई करण्यात येत असते. तथापि वाहनांवर नजर ठेवत असताना स्पीड गनला वाहन संख्येची मर्यादा असल्याने *पामबीच मार्गावरील प्रमुख ब्लॅकस्पॉटवर ॲटोमॅटिक हाय स्पीड डिटेक्शन असणारे अत्याधुनिक कॅमेरे बसविण्याचे निर्देश आयुक्तांनी अभियांत्रिकी विभागास दिले. याव्दारे वाहनांच्या वेगमर्यादेवर बारकाईने लक्ष ठेवले जाणार असून वेगाचे उल्लंघन करणा-या वाहनांची नोंद ॲटोमॅटिक पोलीस नियंत्रण कक्षामध्ये होऊन त्यांच्यावर ई चलनमार्फत दंडात्मक कारवाई होणार आहे. त्याचप्रमाणे पाम बीचवर ठिकठिकाणी बसविण्यात येत असलेल्या सीसीटिव्हीच्या माध्यमातून रेड लाईट व्हायलेशन तसेच नंबर प्लेट डिटेक्शन होणार असून असे नियमभंग करणा-या वाहन चालकांवरही कारवाई केली जाणार आहे.*
*त्याचप्रमाणे पाम बीचवर आवश्यक त्या ठिकाणी वाहनांच्या वेगावर नियंत्रण आणण्याच्या दृष्टीने वाहतुक पोलीस विभागासमवेत पाहणी करून ठिकाणे निश्चित करावीत व त्याठिकाणी वाहन वेग नियंत्रित करण्यासाठी रम्बलर बसविण्याची कार्यवाही त्वरित करण्याचे आयुक्तांनी निर्देशित केले.*
*याशिवाय पामबीचवरील वेगमर्यादा, ती मर्यादा ओलांडल्यास त्यावरील दंडात्मक कारवाई तसेच अपघातप्रवण क्षेत्र (Accident Prone Area) अशी धोक्याची सूचना देणारे मराठी व इंग्रजी भाषेतील फलक सहज नजरेस प़डतील अशाप्रकारे ठळकपणे प्रदर्शित करण्याचे आदेशही आयुक्तांनी यावेळी दिले.*
अशाचप्रकारे ठाणे बेलापूर मार्गाचीही संयुक्त पाहणी करून तेथेही वाहतुक सुरक्षेच्या दृष्टीने आवश्यक उपाययोजना करण्याचे आयुक्तांनी निर्देशित केले.
*अपघातात एखाद्या व्यक्तीचा होणारा दुर्दैवी मृत्यू किंवा त्याला पोहोचणारी शारीरिक हानी हा त्याच्या व त्याच्या कुटुंबावर होणारा फार मोठा आघात असतो. त्यामुळे वाहतुकीच्या नियमांचे काटेकोर पालन करूनच वाहन चालविणे अत्यंत गरजेचे आहे. पाम बीच मार्गावर होणारे अपघात हे प्रामुख्याने वाहतुकीच्या नियमांचे उल्लंघन केल्यामुळेच घडत असल्याचे लक्षात घेऊन नवी मुंबई महानगरपालिका आवश्यक अशा उपाययोजना वाहतुक पोलीस विभागाचे सहकार्य घेऊन करीत आहे. तथापि यामध्ये वाहन चालकांची जबाबदारी सर्वात मोठी असून प्रत्येक चालकाने वाहनाच्या वेग मर्यादेचे पालन करावे तसेच वाहतुकीच्या सर्व नियमांचे पालन करून अपघातविरहित सुरक्षित प्रवास करावा असे आवाहन महापालिका आयुक्त श्री. अभिजीत बांगर यांच्या वतीने करण्यात येत आहे.*
Published on : 11-05-2022 13:12:42,Posted by : Navi Mumbai ,Category : News and update