विविध कला या स्वत:ला प्रकट करण्याचे माध्यम असून नवी मुंबई महानगरपालिकेने नृत्य कलावंतांना प्रोत्साहन देण्यासाठी आयोजित केलेला नृत्य स्पर्धेसारखा उपक्रम उल्लेखनीय असल्याचे मत व्यक्त करीत सुप्रसिध्द अभिनेत्री व नृत्यांगना श्रीम. शर्वरी जमेनीस यांनी देशभक्तीपर भावना विविध प्रकारे अभिव्यक्त करणा-या नृत्य रचना पेश केल्याबद्दल कलावंतांचे व नृत्य समुहांचे कौतुक केले.

     भारतीय स्वातंत्र्याच्या अमृत महोत्सवानिमित्त महापालिका आयुक्त श्री. अभिजीत बांगर यांच्या मार्गदर्शनाखाली नवी मुंबई महानगरपालिकेच्या वतीने विविध उपक्रमांचे आयोजन करण्यात आले आहे. यानिमित्त क्रीडा व सांस्कृतिक विभागाने अमृत महोत्सवी गायन, एकपात्री अभिनय तसेच नृत्य स्पर्धांचे आयोजन केले आहे. त्यामधील अमृत नृत्य स्पर्धेच्या पारितोषिक वितरण सोहळ्याप्रसंगी अंतिम फेरीच्या परीक्षक म्हणून श्रीम. शर्वरी जमेनीस यांनी आपले मनोगत व्यक्त केले. याप्रसंगी क्रीडा व सांस्कृतिक विभागाचे उप आयुक्त श्री. सोमनाथ पोटरे, उप आयुक्त श्री. मनोजकुमार महाले व डॉ. श्रीराम पवार, महापालिका सचिव श्रीम. चित्रा बाविस्कर, प्राथमिक फेरीचे परीक्षक नृत्य दिग्दर्शक श्री. सचिन पाटील, क्रीडा अधिकारी श्री. रेवप्पा गुरव व श्रीम. अभिलाषा म्हात्रे आदी मान्यवर उपस्थित होते.

     भारतीय नृत्याचा आत्मा हा चेहरा असून तो बोलला पाहिजे असे सांगत श्रीम. शर्वरी जमेनीस यांनी नृत्य दिग्दर्शन, नृत्यासाठी गाण्यांची निवड, गाण्यांचे सुयोग्य फ्युजन तसेच वेशभुषा अशा विविध महत्वाच्या बाबींबद्दल मौलीक मार्गदर्शन केले. नृत्याकरिता दिलेल्या विषयाशी प्रामाणिक राहून उत्तम सादरीकरण करणा-या कलावंतांची व समुहांची पारितोषिकासाठी निवड करण्यात आली असल्याचे सांगत पारितोषिक मिळाले नाही अशांनी निराश न होता. आपल्यातील कमतरता शोधून पुढच्या वेळेस अधिक ताकदीने व उमेदीने सादरीकरण करावे अशा शुभेच्छा त्यांनी दिल्या.

     अमृत नृत्य स्पर्धेत 144 इतक्या मोठ्या संख्येने व्यक्तीगत व समुह नृत्यांमध्ये प्रवेशिका दाखल झाल्या होत्या. वैयक्तिक नृत्यात लहान गटात 48 व खुल्या गटात 61 तसेच समुह नृत्यात लहान गटात 16 व खुल्या गटात 19 प्रवेशिका प्राप्त झाल्या. या 144 सादरीकरणाचे प्राथमिक परीक्षण सुप्रसिध्द नृत्यदिग्दर्शक श्री. सचिन पाटील यांनी केले व त्यामधील 34 कलावंत आणि समुहांची अंतिम फेरीसाठी निवड केली.

     अंतिम फेरीचे परीक्षण सुप्रसिध्द अभिनेत्री आणि नृत्यांगना श्रीम. शर्वरी जमेनीस यांनी केले. लहान गटात कुशल महाजन तसेच खुल्या गटात जयेश बंटुमल्ली हे वैयक्तिक नृत्य प्रकारात प्रथम क्रमांकाचे मानकरी ठरले. समुह नृत्यात लहान गटात सुरज डान्स ॲकेडमी आणि मोठ्या गटात एसडीए स्कॉड सिनियर ग्रुप यांनी प्रथम क्रमांकाच्या विजेतेपदाचा बहुमान पटकाविला. प्रत्येक गटात प्रथम तीन आणि 2 उत्तेजनार्थ अशी 5 पारितोषिके प्रदान करण्यात आली.

     * अमृत नृत्य स्पर्धा :-

         लहान गट (वैयक्तिक नृत्य) : प्रथम – कुशल महाजन

                                व्दितीय – ओवी डेगवेकर

                                तृतीय – निहाल राजीवन

                                उत्तेजनार्थ – तन्वी जवाधी व कनिष्का शाह

         खुला गट (वैयक्तिक नृत्य)   : प्रथम – जयेश बंटुमिल्ली

                                व्दितीय – प्रशांत भालेराव

                                तृतीय – मिनारूल मल्लीक

                                उत्तेजनार्थ – मिली सिंह व रुही गायकवाड

         लहान गट (समुह नृत्य) : प्रथम – सुरज डांन्स ॲकेडमी

                                व्दितीय – लक्ष्य डांन्स ॲकेडमी

                                तृतीय – गोल्ड डस्ट डांन्स ग्रुप

                                उत्तेजनार्थ – नमुंमपा शाळा क्र. 42 घणसोली व लिटील एन्जेल्स ग्रुप

         खुला गट (समुह नृत्य)  : प्रथम – एसडीए स्कॉड सिनियर ग्रुप

                                व्दितीय – नृत्यार्चना नृत्य समुह

                                तृतीय – द स्ट्रेंजर्स डान्स ग्रुप

                                उत्तेजनार्थ – मनिकर्णिका डान्स ग्रुप व पीव्हीजी विद्याभवन से. 18 नेरुळ

       याप्रसंगी नवी मुंबई महानगरपालिकेच्या रवी जाधव आणि कर्मचारी नृत्य समुहाने सादर केलेल्या देशभक्तीपर नृत्याचे श्रीम. शर्वरी जमेनीस यांनी विशेष कौतुक केले. तसेच स्वामी ब्रह्मानंद प्रतिष्ठान सीबीडी बेलापूर या शाळेतील दिव्यांग विद्यार्थ्यांनी सादर केलेल्या नृत्याला उपस्थितांनी उभे राहून दाद दिली.

       स्वातंत्र्याच्या अमृत महोत्सवानिमित्त आयोजित नृत्य स्पर्धेला गायन व एकपात्री अभिनय स्पर्धेप्रमाणेच उदंड प्रतिसाद मिळाला. कोरोना कालावधीनंतर कलावंतांना व्यासपीठ मिळवून देण्यासाठी नवी मुंबई महानगरपालिकेने घेतलेल्या पुढाकाराबद्दल परीक्षक म्हणून उपस्थित असेलल्या तिन्ही स्पर्धेतील नामांकीत परीक्षकांनी प्रशंसा केली. कलावंतांच्या वतीनेही मोठ्या प्रमाणात आनंद व्यक्त करण्यात आला.